Emilíana Torrini

Emilíana Torrini í Háskólabíói
Tónlistarkonan Emilíana Torrini heldur tónleika með hljómsveit sinni í Háskólabíói laugardaginn 20. febrúar n.k.

Sælla minninga hélt hún tvenna smekkuppselda tónleika í Háskólabíói í desember sl. í kjölfar útgáfu þriðju plötu sinnar „Me and Armini“. Síðan þá hefur frægðarsól Emilíönu risið ansi hratt því plata hennar ‘Me and Armini’ hefur heldur betur slegið í gegn í Evrópu og þá sérstaklega lagið ‘Jungle Drum’ sem varð lag sumarsins í flestum löndum mið Evrópu.

Emilíana er búin að vera á stanslausu tónleikaferðalagi í Evrópu og Ameríku á þessu ári með hljómsveit sinni og stöðugt verið að bæta við áhorfendafjöldann. Hún spilaði einnig á öllum helstu tónleikahátíðum sumarsins og oftar en ekki lokaði hún kvöldunum. Framundan hjá Emilíönu er tónleikaferðalag um Ástralíu um jól og áramót auk þess sem hún gerir stuttan stans í Japan um miðjan janúar.

Sökum anna hjá Emilíönu var búið að slá útaf borðinu að halda aftur tónleika á Íslandi í bráð en hana langaði svo mikið til þess að hún bara hreinlega bjó til tíma og stígur því aftur á stokk með hljómsveit sinni laugardaginn 20. febrúar n.k. í Háskólabíói.

Forsala á tónleika Emilíönu Torrini hefst fimmtudaginn 26. nóvember kl. 10:00 á midi.is og afgreiðslustöðum mida.is

Aðgöngumiðaverð í forsölu er 4.900.- kr. og er um númeruð sæti að ræða í Háskólabíói.