Oldseed

Craig Bjerring, кантавтор, трубадур, акустичен мајстор, патник, е на D.I.Y. турнеја. Доаѓа во Скопје, најпрво да не запознае, а дури потоа да ни отсвири нешто на својата гитара.
За фанови на: Bonnie ‘Prince’ Billy, Damien Jurado, Johnny Cash, Minor Threat, кантри-панк, фолк-беседи, долги бради, убави стихови, насмевки.


Oldseed е името на самостојниот проект на Craig Bjerring. Потекнува од Канада, но неговите долги турнеи го повлекуваат на север. Претежно настапува во Европа, заради релативно лесниот начин на патување и кул луѓето кои живеат тука. Во моментов е стациониран во едно мало градче во Германија.
Првиот селфтајтлд албум го издава во 2004. Самиот прави копии од албумот и ги продава по завршувањето на своите концерти.
Вториот албум; When You Laugh the World Laughs With You When You Cry You Cry Alone, со нешто повеќе верба во индустријата е издаден во 2005. (Craig плаќа пари на издавачот, за да ги убеди “важните” луѓе да ја слушнат плочата).

Албумот котира солидно на топ листите и луѓето велат дека е навистина одличен. Тоа е добро.
Подоцна му е понудено да работи како социјален работник во германскиот град во кој живее. Издава 10” плоча; Simple Tales of Morality во 2007. Во 2008. дава отказ на работното место и повторно им се посветува на турнеите.
Oldseed на 16.09. ја издаде својата нова 10” плоча; The Terror, со Wot Next Collective (од Холандија).
Настапот на Oldseed во Скопје ќе се случи на 1 октомври (четврток) во бифето на кино Фросина (МКЦ). Концертот е закажан за 21.30, а како бонус добивате и една Плагијат слушалка. На влез, би било фино, да се донира некој денар (100, 150, 500, 1.000, ваш избор), за Craig да ги покрие патните трошоци - хонорар не зема…